ബിജു ചെറിയാന്‍, ന്യൂയോര്‍ക്ക്

ന്യൂയോര്‍ക്ക്: പ്രമുഖ സംഗീതജ്ഞനും, കലാകാരനുമായ സഖറിയാസ് തോമസ് ചാവറ (കുഞ്ഞച്ചന്‍, 71) ഫ്‌ളോറിഡയിലെ താമ്പായില്‍ ഇന്നലെ അന്തരിച്ചു. ഏതാനും നാളുകളായി അസുഖബാധിതനായി ചികിത്സയിലായിരുന്നു. സംസ്‌കാരം പിന്നീട് ടാമ്പായില്‍. ദീര്‍ഘകാലം രജിസ്‌ട്രേഡ് നഴ്‌സായി സേവനം അനുഷ്ഠിച്ചതിനുശേഷം വിരമിച്ച് വിശ്രമജീവിതം നയിച്ചുവരികയായിരുന്നു. ജോസഫൈന്‍ തോമസ് ഭാര്യയും, സജോ തോമസ്, റിജോ തോമസ് എന്നിവര്‍ പുത്രന്മാരുമാണ്. 

തൊണ്ണൂറുകളുടെ ആരംഭത്തില്‍ ഗള്‍ഫ് നാടുകളില്‍ നിന്നും അമേരിക്കയിലെ ന്യൂയോര്‍ക്കില്‍ എത്തിയ സഖറിയാസ് തോമസ് കലാപ്രവര്‍ത്തനത്തോടൊപ്പം തുടര്‍ പഠനത്തിലും വ്യാപൃതനായിരുന്നു. അറിയപ്പെടുന്ന സംഗീതജ്ഞനും, സംഗീത സംവിധായകനും, പിയാനിസ്റ്റും ആയിരുന്നു. ന്യൂയോര്‍ക്ക് യൂണിവേഴ്‌സിറ്റിയില്‍ നിന്നും രജിസ്‌ട്രേഡ് നഴ്‌സ് (R.N) ആയി ബിരുദം സമ്പാദിച്ചതിനുശേഷം ന്യൂയോര്‍ക്ക് സ്റ്റാറ്റന്‍ ഐലന്റിലെ വിവിധ ആശുപത്രികളില്‍ സേവനം അനുഷ്ഠിച്ചു. തുടര്‍ന്ന് കുടുംബത്തോടൊപ്പം ഫ്‌ളോറിഡയിലെ താമ്പായിലേക്ക് താമസം മാറ്റി. ഏതാനും വര്‍ഷങ്ങള്‍ക്ക് മുമ്പ് ഔദ്യോഗിക ജീവിതത്തില്‍ നിന്നും വിരമിച്ച് വിശ്രമ ജീവിതത്തിലായിരുന്നു. 

ആലപ്പുഴ ജില്ലയിലെ കുട്ടനാട് കൈനകരിയിലെ പ്രശസ്തമായ ചാവറ കുടുംബത്തില്‍ ജനിച്ച സഖറിയാസ് തോമസ്, ചാവറ കുഞ്ഞച്ചന്‍ എന്ന പേരില്‍ നാട്ടുകാരിലും സുഹൃത്തുക്കള്‍ക്കുമിടയില്‍ ഏറെ പരിചിതനായിരുന്നു. 

സാറാമ്മ ജോണ്‍ (മോനി, സ്റ്റാറ്റന്‍ഐലന്റ് ന്യൂയോര്‍ക്ക്), തോമസ് ചാവറ (അച്ചന്‍, ഇടപ്പള്ളി, കൊച്ചി), കുഞ്ഞമ്മ ജേക്കബ് (ആലപ്പുഴ), ലിസമ്മ രാജന്‍ (ചിക്കാഗോ), ആന്‍സി ഏബ്രഹാം (ചിക്കാഗോ), ജെയിംസ് തോമസ് ചാവറ (ബേബിച്ചന്‍, ചിക്കാഗോ), സിറിയക് തോമസ് ചാവറ (സോജി, ന്യൂയോര്‍ക്ക്) എന്നിവര്‍ പരേതന്റെ സഹോദരീ- സഹോദരങ്ങളാണ്.

അമേരിക്കയിലെ ആദ്യകാല പ്രവാസികളിലൊരാളും, പ്രമുഖ സാഹിത്യകാരനും, ചരിത്രകാരനുമായ ജോണ്‍ മാത്യു (വേറ്റം) സ്റ്റാറ്റന്‍ഐലന്റ്, ന്യൂയോര്‍ക്ക് പരേതന്റെ മുതിര്‍ന്ന സഹോദരീ ഭര്‍ത്താവാണ്. 

പരേതന്റെ ആകസ്മിക വേര്‍പാടില്‍ സ്റ്റാറ്റന്‍ ഐലന്റ് മലയാളി സമൂഹം ആദരാഞ്ജലികള്‍ അര്‍പ്പിച്ചു. സ്റ്റാറ്റന്‍ഐലന്റ് മലയാളി അസോസിയേഷന്‍ പ്രസിഡന്റ് ജേക്കബ് ജോസഫ്, കേരള സമാജം ഓഫ് സ്റ്റാറ്റന്‍ഐലന്റ് പ്രസിഡന്റ് പ്രിന്‍സ് തോമസ്, മലയാളി സീനിയര്‍ ഫോറം പ്രസിഡന്റ് തോമസ് തോമസ് പാലത്തറ, എക്യൂമെനിക്കല്‍ കൗണ്‍സില്‍ മുന്‍ സെക്രട്ടറിയും സാമൂഹ്യ പ്രവര്‍ത്തകനുമായ ക്യാപ്റ്റന്‍ രാജു ഫിലിപ്പ് എന്നിവര്‍ അനുശോചിച്ചു.