ന്യൂയോര്‍ക്ക്:  അമ്പത്തിരണ്ട് വര്‍ഷം പ്രവര്‍ത്തന പാരമ്പര്യമുള്ള ന്യൂയോര്‍ക്കിലെ ഏറ്റവും പുരാതന മലയാളീ സംഘടനയായ  കേരളാ സമാജം ഓഫ് ഗ്രെയ്റ്റര്‍ ന്യൂയോര്‍ക്ക് അതിന്റെ അന്‍പത്തിമൂന്നാമത് വാര്‍ഷിക പ്രവര്‍ത്തനോദ്ഘാടനവും വിഷു-ഈസ്റ്റര്‍ ആഘോഷവും മെയ് 3 ശനിയാഴ്ച വൈകിട്ട് 6 മണിക്ക് നടത്തപ്പെടുന്നു. ഫ്‌ലോറല്‍ പാര്‍ക്കിലുള്ള ടൈസണ്‍ സെന്റര്‍ ഓഡിറ്റോറിയത്തില്‍ വച്ച് (Tyson Center, 26 North Tyson Avenue, Floral Park, NY 11001) ചടങ്ങുകള്‍ അതിവിപുലമായി നടത്തുന്നതിനുള്ള ക്രമീകരണങ്ങള്‍ പുരോഗമിക്കുന്നു.

സമാജം പ്രസിഡന്റ് സജി എബ്രഹാം, സെക്രട്ടറി മാത്യുക്കുട്ടി ഈശോ, ട്രഷറര്‍ വിനോദ് കെയാര്‍ക്കേ, വൈസ് പ്രസിഡന്റ് ബെന്നി ഇട്ടീറ, ജോയിന്റ് സെക്രട്ടറി ജോസി സ്‌കറിയ, ബോര്‍ഡ് ഓഫ് ട്രസ്റ്റീ ചെയര്‍മാന്‍ വിന്‍സെന്റ് സിറിയക്  എന്നിവരുടെ ചുമതലയിലുള്ള ഭരണ സമിതിയും എക്‌സിക്യൂറ്റീവ്  കമ്മറ്റി അംഗംങ്ങളും ബോര്‍ഡ് ഓഫ് ട്രസ്റ്റീ അംഗങ്ങളും സംയുക്തമായി പ്രസ്തുത ആഘോഷങ്ങളുടെ ക്രമീകരണങ്ങള്‍ക്ക് നേതൃത്വം നല്‍കുന്നു. പ്രവര്‍ത്തനോദ്ഘാടനത്തോട് അനുബന്ധിച്ച് ഈസ്റ്റര്‍-വിഷു ആഘോഷവും, സമാജത്തിലെ മുന്‍കാല പ്രസിഡന്റുമാരെ കോര്‍ത്തിണക്കി സമാജത്തിന്റെ ചരിത്രത്തിലാദ്യമായി പ്രസിഡന്റ്സ് ഫോറത്തിന്റെ രൂപീകരണ ഉദ്ഘാടനവും നടത്തപ്പെടുന്നതാണ്.

മേഴ്സി ഹോസ്പിറ്റല്‍ ചാപ്ലയിനും പ്രശസ്ത വാഗ്മിയുമായ ഫാദര്‍ യേശുദാസ് അന്നേദിവസം ഈസ്റ്റര്‍  സന്ദേശവും, നോര്‍ത്തവെല്‍ ആശുപത്രിയിലെ പ്രശസ്ത നെഫ്രോളജിസ്റ്റായ ഡോ. മധു ഭാസ്‌കര്‍ വിഷു സന്ദേശവും നല്‍കുന്നതാണ്. അരനൂറ്റാണ്ടിലധികമായി ന്യൂയോര്‍ക്കില്‍ പ്രവര്‍ത്തിക്കുന്ന സമാജത്തിന്റെ മുന്‍കാല പ്രസിഡന്റുമാരില്‍ ഏകദേശം രണ്ട് ഡസനോളം പേര്‍ നിലവില്‍ ന്യൂയോര്‍ക്ക് ലോങ്ങ് ഐലന്‍ഡ് പ്രദേശത്ത് താമസിക്കുന്നുണ്ട്. അവരെ സമന്വയിപ്പിച്ച് രുപീകരിക്കുന്ന 'പ്രസിഡന്റ്സ് ഫോറം' അന്നേ ദിവസം ഉദ്ഘാടനം ചെയ്യുന്നതിനുള്ള തയ്യാറെടുപ്പും നടന്നു വരുന്നു. പ്രസ്തുത പ്രസിഡന്റുമാരെയെല്ലാം സദസ്സിന് പരിചയപ്പെടുത്തി ആദരിക്കുന്നതിനും പിന്നീട് സമാജത്തിന്റെ തുടര്‍ന്നുള്ള പ്രവര്‍ത്തനങ്ങളില്‍ അവരുടെ അഭിപ്രായങ്ങളും മാര്‍ഗ്ഗ നിര്‍ദ്ദേശങ്ങളും മുതല്‍ക്കൂട്ടാക്കുന്നതിനും നിലവിലെ ഭരണ സമിതി പ്രതീക്ഷിക്കുന്നു.

പ്രാദേശിക കലാകാരികളുടെ മനോഹരമായ ഡാന്‍സുകളാലും ശ്രവണസുന്ദരമായ ഗാനങ്ങളാലും വിഭവ സമൃദ്ധമായ അത്താഴ വിരുന്നിനാലും ചടങ്ങുകള്‍ ഏറ്റവും ഭംഗിയാക്കുന്നതിന് കമ്മറ്റി അംഗങ്ങളായ ലീലാ മാരേട്ട്, ഷാജി വര്‍ഗ്ഗീസ്, ഹേമചന്ദ്രന്‍, മാമ്മന്‍ എബ്രഹാം, തോമസ് വര്‍ഗ്ഗീസ്, ബാബു പാറക്കല്‍, പ്രകാശ് തോമസ്, ചാക്കോ കോയിക്കലത്ത്, ജോയ്സണ്‍ വര്‍ഗ്ഗീസ് എന്നിവരും ട്രസ്റ്റീ ബോര്‍ഡ് അംഗങ്ങളായ വര്‍ഗ്ഗീസ് കെ ജോസഫ്, പോള്‍ പി ജോസ്, ഫിലിപ്പോസ് കെ ജോസഫ്, തോമസ് ഡേവിഡ് എന്നിവരും നേതൃത്വം നല്‍കി വരുന്നു. എല്ലാ കേരളാ സമാജം അംഗങ്ങളെയും അഭ്യുദയകാംക്ഷികളെയും പ്രസ്തുത ചടങ്ങിലേക്ക് പ്രസിഡന്റ് സജി എബ്രഹാം പ്രത്യേകം ക്ഷണിക്കുന്നു. പ്രവേശനം പാസ്സ് മൂലം നിയന്ത്രിക്കുന്നതാണ്.

കൂടുതല്‍ വിവരങ്ങള്‍ക്ക്: (1)  Saji Abraham, President -  (917) 617-3959   (2) Mathewkutty Easow, Secretary -  (516) 455-8596  (3)  Vinod Kearke, Treasurer - (516) 633-5208.