കാലിടറാത്ത കുട്ടിയെപ്പോലെ 
കാലം നടന്നു പോകുമ്പോൾ . 
ഞൊണ്ടിക്കാലുകളിൽ 
ഞൊണ്ടിപ്പിടഞ്ഞ്‌ 
കൂടെയെത്താൻ 
പാട് പെട്ട് നമ്മൾ !

കുതിപ്പിന്റെ സ്വപ്‌നങ്ങൾ 
കുതിരകളായി 
കൂടെ വന്നപ്പോൾ 
നീതി ശാസ്ത്രങ്ങളുടെ 
ചാട്ടവാറുകളിൽ 
നിന്റെ ചർമ്മം 
നിലവിളിച്ചിരുന്നു.

വഴിയോരങ്ങൾ വീണ്ടെടുത്ത 
വിയർപ്പു മണികൾ 
ഉപേക്ഷിച്ച് 
വീഴ്ചയുടെ വിഹ്വലതകളിൽ 
വികലാംഗരായി 
വിലാപ യാത്ര !

ഇന്നലെകളെ ചവിട്ടി മെതിച്ച
ഇന്നിന്റെ വിരിമാരിലൂടെ 
ഇല്ലാത്ത നാളെയിലേക്കുള്ള 
ഈ യാത്രയിൽ 
പല്ല് കൊഴിഞ്ഞ 
സിംഹങ്ങളെപ്പോലെ പട്ടിണിക്കോലങ്ങൾ 
വീണു പോകുന്നു !

എത്തിച്ചേരാൻ എളുപ്പമല്ലാത്ത 
ചക്രവാളങ്ങൾ 
ദൂരെ നിൽക്കുമ്പോൾ 
മിഥ്യകളുടെ വിലാപ യാത്രികർ
ലക്ഷ്യം കാണാതെ 
തിരിച്ചു പോകുന്നു !

മണ്ണിലേക്ക്, മനസ്സിലേക്ക്
അദ്വൈത സത്തയായി 
അപഗ്രഥിച്ച് 
ഇവയെ ചേർത്ത് വച്ച 
ആദി ശങ്കര ചിന്തയിലെ 
പ്രപഞ്ചത്തിലേക്ക് !