ന്യൂഡൽഹി: പശ്ചിമേഷ്യയിൽ വർദ്ധിച്ചുവരുന്ന സംഘർഷങ്ങളുടെ പശ്ചാത്തലത്തിൽ ഇറാൻ വ്യോമപാത അടച്ചതിനെ തുടർന്ന് വിമാന സർവീസുകൾ താളംതെറ്റി. എയർ ഇന്ത്യയും ഇൻഡിഗോയും ഉൾപ്പെടെയുള്ള വിമാനക്കമ്പനികൾ യാത്രക്കാർക്ക് കാലതാമസവും റദ്ദാക്കലുകളും ഉണ്ടാകാൻ സാധ്യതയുണ്ടെന്ന് മുന്നറിയിപ്പ് നൽകിയിട്ടുണ്ട്. ഇസ്രായേലും ഇറാനും തമ്മിലുണ്ടായ മിസൈൽ ആക്രമണങ്ങൾക്ക് പിന്നാലെ വ്യോമയാന അധികൃതർ യാത്രാ മുന്നറിയിപ്പുകൾ പുറപ്പെടുവിച്ചതോടെയാണ് ഈ നടപടി.

നിലവിലെ സാഹചര്യത്തിൽ വിമാനങ്ങൾ വഴിതിരിച്ചുവിടാനും സാധ്യതയുണ്ടെന്ന് എയർലൈനുകൾ അറിയിച്ചു. യാത്രക്കാർക്ക് അസൗകര്യം ഒഴിവാക്കുന്നതിനായി യാത്ര പുറപ്പെടുന്നതിന് മുമ്പ് വിമാനക്കമ്പനികളുമായി ബന്ധപ്പെട്ട് ഏറ്റവും പുതിയ വിവരങ്ങൾ അറിയണമെന്ന് നിർദ്ദേശിച്ചിട്ടുണ്ട്.

അതിനിടെ, ഇസ്രായേലിലെ ഇന്ത്യൻ എംബസി ഇന്ത്യൻ പൗരന്മാർക്ക് പുതിയ സുരക്ഷാ മുന്നറിയിപ്പ് നൽകി. എല്ലാ ഇന്ത്യൻ പൗരന്മാരും ജാഗ്രത പാലിക്കണമെന്നും പ്രാദേശിക സുരക്ഷാ മാർഗ്ഗനിർദ്ദേശങ്ങൾ കർശനമായി പാലിക്കണമെന്നും എംബസി ആവശ്യപ്പെട്ടു. ഇറാനെതിരായ ഇസ്രായേലിന്റെ നിലവിലെ സൈനിക നടപടിയായ 'ഓപ്പറേഷൻ റൈസിംഗ് ലയൺ' സംബന്ധിച്ച് ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹു ഇന്ത്യൻ പ്രധാനമന്ത്രി നരേന്ദ്ര മോദിയെ വിവരമറിയിച്ചതിന് തൊട്ടുപിന്നാലെയാണ് ഈ മുന്നറിയിപ്പ് പുറത്തിറക്കിയത്.

English summary:

Iran closes airspace: Air India and IndiGo reroute flights; advisory issued for passengers.