അഹമ്മദാബാദിൽ അടുത്തിടെയുണ്ടായ എയർ ഇന്ത്യ 787 ഡ്രീംലൈനർ വിമാനത്തിന്റെ ദാരുണമായ അപകടത്തെത്തുടർന്ന്, വിമാനത്തിന്റെ എഞ്ചിൻ നിയന്ത്രണ സംവിധാനങ്ങളിലെ സോഫ്റ്റ്‌വെയർ തകരാറുകൾ സംബന്ധിച്ച ആശങ്കകൾ ശക്തമാകുന്നു. വിമാനം പറന്നുയർന്നതിന് തൊട്ടുപിന്നാലെയുണ്ടായ ഈ അപകടത്തിൽ 241 പേർക്ക് ജീവൻ നഷ്ടപ്പെട്ടിരുന്നു.

വിമാനത്തിന്റെ എൻജിന്റെ ഇലക്ട്രോണിക് എൻജിൻ കൺട്രോളിൽ (FADEC) ഒരു സോഫ്റ്റ്‌വെയർ തകരാർ സംഭവിച്ചാൽ, അത് പൈലറ്റുമാരുടെയോ കമ്പ്യൂട്ടറുകളുടെയോ നിയന്ത്രണം നഷ്ടപ്പെടുത്തുകയും എഞ്ചിന്റെ ത്രസ്റ്റ് റോൾബാക്ക്' അഥവാ എൻജിന്റെ ശക്തി കുറയാൻ ഇടയാക്കുകയും ചെയ്യുമെന്നാണ് വിദഗ്ദർ ചൂണ്ടിക്കാട്ടുന്നത്. ഈ സാധ്യതയെക്കുറിച്ച് യുഎസ് ഫെഡറൽ ഏവിയേഷൻ അഡ്മിനിസ്ട്രേഷൻ (FAA) മുമ്പും മുന്നറിയിപ്പുകൾ നൽകിയിട്ടുണ്ട്. കൂടാതെ, ഓരോ 11,000 ഫ്ലൈറ്റ് സൈക്കിളുകൾ കഴിയുമ്പോഴും എൻജിൻ കൺട്രോൾ ഘടകം (ECC) മാറ്റണമെന്ന് FAA നിർബന്ധമാക്കിയിട്ടുമുണ്ട്.

യുഎസ് ഗതാഗത വകുപ്പിലെ മുൻ ഇൻസ്പെക്ടർ ജനറലും പ്രമുഖ ഏവിയേഷൻ അറ്റോർണിയുമായ മേരി ഷിയാവോ, എയർ ഇന്ത്യയുടെ ഈ അപകടത്തിൽ സോഫ്‌റ്റ്‌വെയർ തകരാറിനുള്ള സാധ്യതയെക്കുറിച്ച് ശക്തമായ ആശങ്കകൾ പ്രകടിപ്പിച്ചിട്ടുണ്ട്. 2019-ൽ ജപ്പാനിലെ ഓൾ നിപ്പോൺ എയർവേയ്‌സിന് (ANA) സമാനമായ ഒരു സംഭവം ഉണ്ടായപ്പോൾ, അത് സോഫ്റ്റ്‌വെയറിലെ പിഴവ് മൂലമാണെന്ന് യുഎസ് നാഷണൽ ട്രാൻസ്പോർട്ടേഷൻ സേഫ്റ്റി ബോർഡ് (NTSE) കണ്ടെത്തിയിരുന്നു. ഈ തകരാർ പിന്നീട് പരിഹരിക്കുന്നതിനുള്ള നടപടികൾ സ്വീകരിക്കുകയും ചെയ്തിരുന്നു.
ബോയിംഗ് 787 വിമാനങ്ങളിലെ ത്രസ്റ്റ് കൺട്രോൾ മാൽഫംഗ്ഷൻ അക്കമൊഡേഷൻ' (TCMA) സിസ്റ്റത്തെക്കുറിച്ചും മേരി ഷിയാവോ പ്രത്യേകം പരാമർശിച്ചു. വിമാനം നിലത്താണെന്ന് തെറ്റായി മനസ്സിലാക്കിയാൽ, ഈ സംവിധാനം എൻജിൻ ത്രസ്റ്റ് യാന്ത്രികമായി കുറയ്ക്കാൻ സാധ്യതയുണ്ട്. ഇത്തരം സംഭവങ്ങൾ വിമാനത്തിന്റെ ഫ്ലൈറ്റ് ഡാറ്റാ റെക്കോർഡറിൽ വ്യക്തമായ വിവരങ്ങൾ രേഖപ്പെടുത്തുമെന്നും, അന്വേഷണ ഉദ്യോഗസ്ഥർ ഇത് സൂക്ഷ്മമായി പരിശോധിക്കണമെന്നും ഷിയാവോ ആവശ്യപ്പെട്ടു.

നിലവിൽ, ഇന്ത്യൻ എയർക്രാഫ്റ്റ് ആക്സിഡൻറ് ഇൻവെസ്റ്റിഗേഷൻ ബ്യൂറോ (AAIB) ഈ അപകടത്തെക്കുറിച്ച് വിശദമായ അന്വേഷണം നടത്തിവരികയാണ്. യുഎസ് എൻടിഎസ്ബിയുടെയും മറ്റ് ഏജൻസികളുടെയും സഹായവും അവർ തേടുന്നുണ്ട്. എൻജിൻ തകരാർ, പൈലറ്റുമാരുടെ പിഴവുകൾ, അട്ടിമറി സാധ്യതകൾ തുടങ്ങി എല്ലാ വശങ്ങളും അന്വേഷണത്തിന്റെ പരിധിയിൽ വരുന്നുണ്ട്. ബോയിംഗ് 787 വിമാനങ്ങളിലെ സോഫ്റ്റ്‌വെയർ തകരാറുകൾ സംബന്ധിച്ച ആശങ്കകൾ നിലനിൽക്കുന്ന സാഹചര്യത്തിൽ, ഈ അപകടത്തിന്റെ യഥാർത്ഥ കാരണം കണ്ടെത്താൻ ഈ അന്വേഷണം നിർണായകമാണ്.