മലയാളികൾക്ക് സുപരിചിതയായ നടി പ്രിയാമണി, താൻ ഒരു സിനിമയിൽ മാത്രം അഭിനയിച്ചിട്ടുള്ള നടൻ സൂര്യയെക്കുറിച്ച് മനസ്സുതുറക്കുന്നു. സൂര്യ മികച്ച വ്യക്തിത്വത്തിന് ഉടമയാണെന്നും, അദ്ദേഹത്തോടൊപ്പം പ്രവർത്തിച്ച 'രക്ത ചരിത്ര' എന്ന ചിത്രം തനിക്ക് മറക്കാനാവാത്ത അനുഭവമാണെന്നും പ്രിയാമണി വ്യക്തമാക്കി. നടൻ കാർത്തിക്കും ജ്യോതികയുമായി തനിക്ക് നല്ല സൗഹൃദമുണ്ടെന്നും പ്രിയാമണി കൂട്ടിച്ചേർത്തു.
"നിർഭാഗ്യവശാൽ ആകെ ഒരൊറ്റ സിനിമയിൽ മാത്രമേ എനിക്ക് സൂര്യയോടൊപ്പം അഭിനയിക്കാൻ സാധിച്ചുള്ളൂ. പിന്നീട് സൂര്യയോടൊപ്പം എനിക്ക് വർക്ക് ചെയ്യാൻ സാധിച്ചിട്ടില്ല. വളരെ നല്ല വ്യക്തിത്വത്തിന് ഉടമയാണ് സൂര്യ," പ്രിയാമണി പറഞ്ഞു. സൂര്യയുടെ സഹോദരൻ കാർത്തിയും ജ്യോതികയുമായി തനിക്ക് നല്ല സൗഹൃദമുണ്ടെന്നും നടി സൂചിപ്പിച്ചു. "കാർത്തിയും ജ്യോതികയും 916 ഹോൾമാർക്ക് സ്വർണമാണ്. ആ കുടുംബത്തിലെ എല്ലാവരും നല്ല ആളുകളാണ്," പ്രിയാമണി കൂട്ടിച്ചേർത്തു.

കാർത്തിയുമായി ഇപ്പോഴും ഇടയ്ക്കിടെ മെസ്സേജുകളിലൂടെ സംസാരിക്കാറുണ്ടെന്നും, എല്ലാ പിറന്നാളിനും മുടങ്ങാതെ ആശംസകൾ അറിയിക്കുന്നയാൾ കാർത്തിയാണെന്നും പ്രിയാമണി വെളിപ്പെടുത്തി. സൂര്യയുമായി 'രക്ത ചരിത്ര'യുടെ സമയത്ത് നല്ല ബന്ധമായിരുന്നുവെങ്കിലും, ആ സിനിമയ്ക്ക് ശേഷം കൂടുതൽ സമ്പർക്കമില്ലെന്നും നടി പറഞ്ഞു. ജ്യോതികയുമായി അത്യാവശ്യം നല്ല സൗഹൃദത്തിലാണെന്നും ഇടയ്ക്കിടെ ചാറ്റ് ചെയ്യാറുണ്ടെന്നും പ്രിയാമണി വ്യക്തമാക്കി.

സൂര്യയോടൊപ്പം പ്രവർത്തിച്ച 'രക്ത ചരിത്ര' തനിക്ക് മറക്കാനാവാത്ത അനുഭവമാണെന്ന് പ്രിയാമണി ആവർത്തിച്ചു. "നല്ലൊരു ക്യാരക്ടറായിരുന്നു ആ പടത്തിൽ എനിക്ക്. ആ സിനിമയുടെ സെറ്റിൽ വെച്ചായിരുന്നു എൻ്റെ പിറന്നാൾ ആഘോഷിച്ചത്. കേക്കൊക്കെ കട്ട് ചെയ്ത ശേഷം രാം ഗോപാൽ വർമ്മ സാർ 'അടുത്തത് ബ്ലാസ്റ്റ് സീനാണ്, വേഗം മേക്കപ്പ് ചെയ്യ്' എന്നായിരുന്നു പറഞ്ഞത്. ഞാൻ അത് കേട്ട് വല്ലാതായി," പ്രിയാമണി ഓർമിച്ചു.

English summary:

Surya is 916 hallmark gold, but I haven’t had any contact with him after that film"; Raktha Charithra was an unforgettable experience: says Priyamani.