അമ്മ അമ്മിയിലരച്ചാൽ വീടാകെ വേവു മണം പടരും.
അമ്മിക്കൊപ്പം അമ്മയരയുന്നതറിയാതെ
അമ്മി മഹാത്മ്യം പറഞ്ഞ്
അച്ഛനും മക്കളും.
പുതുമണം മാറാത്തൊരു 
മിക്സിക്കുട്ടൻ 
ഷോക്കേസിലിരുന്നപ്പോൾ അമ്മയുടെ വിധിയോർത്ത് ആർത്ത് ചിരിക്കും.

അന്ന് അമ്മ തന്നെ തേടി വരാതിരുന്നപ്പോൾ അടുക്കള കടന്നൊരു നോട്ടം ഹാളിലേക്ക് തെന്നി വീണു.
ഇനി നിനക്കുമെനിക്കും വിശ്രമം !
ഹാളിലെ സിമന്റ്‌ അടർന്ന തറയിൽ കിടന്നമ്മ തന്നെ തിരഞ്ഞ അമ്മിയോടായി മന്ത്രിച്ചു.
അന്നാദ്യമായി അടുക്കളയിൽ വേവു മണം പരന്നില്ല.

തലേന്ന് തന്റെ മാറിൽ വീണ ഇനിയുമുണങ്ങാത്ത ഒരു തുള്ളി കണ്ണുനീരിൽ അന്നാദ്യമായി അമ്മി ഉരുകി.

അമ്മയുടെ കിടപ്പ് കണ്ട്
ചുവരിലെ ഷോക്കേസിലിരുന്ന് മിക്സിക്കുട്ടൻ ഉറക്കെ നിലവിളിച്ചു.

“അമ്മേയെന്നൊരു “കൂട്ട നിലവിളിയപ്പോൾ തീൻ മേശ കടന്ന് തെക്കേ തൊടിയിലേക്ക് പാഞ്ഞു.