ഇറാൻ-ഇസ്രായേൽ സംഘർഷം വ്യോമയാന മേഖലയിൽ വലിയ പ്രത്യാഘാതങ്ങൾ സൃഷ്ടിക്കുന്നു. ദുബായ് രാജ്യാന്തര വിമാനത്താവളത്തിലേക്കുള്ള (DXB) മധ്യപൂർവ ദേശത്തെ സംഘർഷ മേഖലയ്ക്ക് പുറത്തുള്ള ചില റൂട്ടുകളിലെ വിമാന സർവീസുകൾ റദ്ദാക്കുന്നത് വർധിച്ചതായി ഫ്ലൈറ്റ്റഡാർ24, ഫ്ലൈറ്റ്അവയർ എന്നിവയുടെ പുതിയ കണക്കുകൾ സൂചിപ്പിക്കുന്നു. ഈ മാസം 13-ന് ആരംഭിച്ച പ്രതിസന്ധിയെത്തുടർന്നുണ്ടായ വ്യോമാതിർത്തിയിലെ തടസ്സങ്ങളാണ് ഇതിന് കാരണം.

ലോകത്തിലെ ഏറ്റവും തിരക്കേറിയ വ്യോമ ഇടനാഴികളിലൊന്നായ യുഎഇ-ഇന്ത്യ സർവീസുകൾ ഉൾപ്പെടെ, നിരവധി വിമാനങ്ങൾ റദ്ദാക്കുകയും വൈകുകയും ചെയ്തതോടെ നൂറുകണക്കിന് യുഎഇ നിവാസികളും വിനോദസഞ്ചാരികളും ദുരിതത്തിലായി. ആകാശപാതയിലെ തിരക്ക് കാരണം വിമാനക്കമ്പനികൾക്ക് ഒന്നുകിൽ കൂടുതൽ ദൈർഘ്യമുള്ള വഴിതിരിച്ചുവിടലുകൾ നടത്തേണ്ടി വരുന്നു, ഇത് യാത്രാ സമയം മണിക്കൂറുകളോളം വർധിപ്പിച്ചു. അല്ലെങ്കിൽ, വിമാന സർവീസും ജീവനക്കാരുടെ ഷെഡ്യൂളുകളും താളം തെറ്റാതിരിക്കാൻ വിമാനങ്ങൾ പൂർണ്ണമായും റദ്ദാക്കേണ്ടി വരുന്നു.

ഏറ്റവും പുതിയ ഫ്ലൈറ്റ് ട്രാക്കിങ് ഡാറ്റ പ്രകാരം, പാകിസ്ഥാൻ, ഇന്ത്യ എന്നിവിടങ്ങളിൽ നിന്നുള്ള ഇൻബൗണ്ട് സർവീസുകളിലെ റദ്ദാക്കൽ നിരക്കുകൾ കുത്തനെ ഉയർന്നിട്ടുണ്ട്. കറാച്ചി, ലാഹോർ, മുൾട്ടാൻ എന്നിവിടങ്ങളിൽ നിന്നുള്ള വിമാനങ്ങൾ റദ്ദാക്കപ്പെട്ടതോടെ, പ്രതിസന്ധിക്ക് മുൻപുള്ള 5% റദ്ദാക്കൽ നിരക്കിൽ നിന്ന് ഇത് ഏകദേശം 20% ആയി ഉയർന്നു, ഇത് നാല് മടങ്ങ് വർധനവാണ് കാണിക്കുന്നത്. യൂറോപ്പിൽ നിന്നുള്ള വിമാനങ്ങളെ അത്രയധികം ബാധിച്ചിട്ടില്ലെങ്കിലും, ഇസ്താംബുൾ പോലുള്ള ഹബ്ബുകളിൽ നിന്നുള്ള റൂട്ടുകളിൽ ഇപ്പോൾ 5-10% റദ്ദാക്കൽ നിരക്ക് നേരിടുന്നുണ്ട്, ഇത് സാധാരണയായി 1-3% ആയിരുന്നു. ഇറാൻ, ഇറാഖ്, ജോർദാൻ, ഇസ്രായേൽ എന്നിവിടങ്ങളിലെ വ്യോമാതിർത്തി അടച്ചിടുന്നത് ഏഷ്യ, യൂറോപ്പ്, ഗൾഫ് എന്നിവിടങ്ങൾക്കിടയിലുള്ള വിമാന റൂട്ടുകളിൽ അപ്രതീക്ഷിത പ്രത്യാഘാതങ്ങൾ സൃഷ്ടിക്കുകയാണ്.

English summary:

Iran-Israel conflict: Dubai flight services disrupted; airspace restrictions cause hardship for passengers.