2016 ൽ മോളിവുഡ് കോമഡി ‘പോപ്‌കോൺ’ എന്ന ചിത്രത്തിലൂടെയാണ് സംയുക്ത മേനോൻ സിനിമാ ലോകത്തേക്ക് കടന്നുവന്നത്. ബോക്സ് ഓഫീസിൽ വലിയ ചലനം സൃഷ്ടിക്കുന്നതിൽ ചിത്രം പരാജയപ്പെട്ടെങ്കിലും, പുതുമുഖമായ സംയുക്തയുടെ ആത്മവിശ്വാസത്തോടെയുള്ള പ്രകടനത്തിന് മികച്ച സ്വീകാര്യത ലഭിച്ചു. 

നടിയുടെ ചിത്രങ്ങളിൽ ശ്രദ്ധേയമായത് തീവണ്ടി (2018) യാണ്. ചുരുങ്ങിയ കാലം കൊണ്ട് തെന്നിന്ത്യയിലെ മുൻനിര നടിമാരുടെ പട്ടികയിലേക്ക് എത്തിയ അഭിനേത്രിയാണ് സംയുക്ത മേനോൻ എന്ന് പറയാം. മലയാളത്തിൽ ഏറ്റവും കൂടുതൽ പ്രതിഫലം വാങ്ങുന്ന നടിമാരിൽ ഒരാളായി സംയുക്ത കണക്കാക്കപ്പെടുന്നു.

കടുവയ്ക്കുശേഷം സംയുക്ത മലയാളം വിട്ട് തമിഴിലേക്കും തെലുങ്കിലേക്കും ചേക്കറി. പവൻ കല്യാണിനൊപ്പം ഭീംല നായക് ചെയ്തശേഷം തെലുങ്കിൽ നിന്നാണ് നടിക്ക് ഏറെയും അവസരങ്ങൾ ലഭിക്കുന്നത്. പാലക്കാടാണ് സംയുക്തയുടെ സ്വദേശം. ഇരുപത്തിയൊമ്പതുകാരിയായ നടി ഇരുപത്തിയൊന്ന് വയസിലാണ് ക്യാമറയ്ക്ക് മുന്നിലേക്ക് എത്തുന്നത്. പ്ലസ് ടു വിദ്യാർത്ഥിനിയായിരുന്ന സംയുക്തയുടെ സോഷ്യൽമീഡിയയിൽ പ്രത്യക്ഷപ്പെട്ട ഫോട്ടോകളാണ് ആദ്യ സിനിമയായ പോപ്കോണിലേക്ക് എത്തിച്ചത്. അന്ന് സിനിമയിൽ ചെറിയൊരു കഥാപാത്രത്തെയായിരുന്നു നടി അവതരിപ്പിച്ചത്.

പിന്നീട് ഒരു വർഷം കഴിഞ്ഞപ്പോഴാണ് കരിയറിൽ തന്നെ ടേണിങ് പോയിന്റായി മാറിയ തീവണ്ടി സംഭവിക്കുന്നത്. ടൊവിനോ തോമസിന്റെ നായികയായി തീവണ്ടിയിൽ അതിശയിപ്പിക്കുന്ന പ്രകടനം കാഴ്ചവെച്ചു. പാട്ടുകൾ റിലീസായപ്പോൾ തന്നെ സംയുക്തയെ എല്ലാവരും നോട്ട് ചെയ്ത് തുടങ്ങിയിരുന്നു. പിന്നീട് റിലീസിനുശേഷം സിനിമയ്ക്കൊപ്പം നായികയും ഹിറ്റായി.

തീവണ്ടി എന്ന ചിത്രത്തിലെ സാരിയും ചുരിദാറും ചുറ്റിയ നാടൻ പെൺകൊടി ദേവിയിൽ നിന്നും അടിമുടി മാറ്റമാണ് ഒമ്പത് വർഷത്തിനിടയിൽ സംഭവിച്ചത്. ശരീര ഭാരം കുറച്ച് ഫിറ്റ്നസ് നിലനിർത്തി ബോളിവുഡ് താരസുന്ദരിമാരോട് കിടപിടിക്കുന്ന തരത്തിലുള്ള ലുക്കിലാണ് സംയുക്ത ഇപ്പോൾ. കേരളത്തിൽ വന്ന് മലയാളം മീഡിയയ്ക്ക് നടി ഒരു അഭിമുഖം കൊടുത്തിട്ട് നാളുകൾ ഏറെയായി.

പക്ഷെ തമിഴ്, തെലുങ്ക് മാധ്യമങ്ങളിൽ ഇടയ്ക്കിടെ നടിയുടെ അഭിമുഖം പ്രത്യക്ഷപ്പെടാറുണ്ട്. അന്യഭാഷയിൽ സജീവമായശേഷം തമിഴും തെലുങ്കുമെല്ലാം നടി നന്നായി കൈകാര്യം ചെയ്യും. ഇപ്പോഴിതാ ഒരിക്കൽ ഒരഭിമുഖത്തിൽ സ്വകാര്യ ജീവിതവുമായി ബന്ധപ്പെട്ട ചോ​ദ്യങ്ങൾക്ക് നടി മറുപടി നൽകിയിരുന്നു. ശീലങ്ങളെ കുറിച്ച് സംസാരിക്കവെ ഇടയ്ക്ക് മദ്യപിക്കാൻ താൽപര്യപ്പെടുന്നയാളാണ് താനെന്ന് സംയുക്ത പറയുന്നു.

വല്ലപ്പോഴും മദ്യപിക്കാനുള്ള കാരണവും സംയുക്ത അഭിമുഖത്തിൽ വിശദീകരിച്ചു. എനിക്ക് മദ്യം കഴിക്കുന്ന ശീലമുണ്ട്.  എല്ലാ ദിവസവും മദ്യം കഴിക്കാറില്ല. സമ്മർദ്ദമോ ഉത്കണ്ഠയോ തോന്നുമ്പോൾ ഞാൻ കുറച്ച് കുടിക്കും. അതിലും ഉപയോ​ഗിക്കുന്നത് ഏറെയും വൈനാണ്. മ​ദ്യപിക്കണമോ വേണ്ടയോ എന്നത് ഓരോരുത്തരുടേയും ചോയിസാണെന്നും അതിൽ കമന്റ് ചെയ്യാൻ താൽപര്യപ്പെടുന്നില്ലെന്നും നടി കൂട്ടിച്ചേർത്തു