വാഷിംഗ്ടൺ ഡി.സി.: കാലിഫോർണിയ ആസ്ഥാനമായുള്ള അഗസ്റ്റ് എഗ്ഗ് കമ്പനിയുടെ മുട്ടകളുമായി ബന്ധപ്പെട്ട് സാൽമൊണെല്ല ബാധ സ്ഥിരീകരിച്ചു. കുറഞ്ഞത് 79 പേർക്ക് രോഗം പിടിപെടുകയും 21 പേരെ ആശുപത്രിയിൽ പ്രവേശിപ്പിക്കുകയും ചെയ്തതായി യു.എസ്. ആരോഗ്യ ഉദ്യോഗസ്ഥർ വെള്ളിയാഴ്ച അറിയിച്ചു. ഇതേത്തുടർന്ന്, കമ്പനി 1.7 ദശലക്ഷം ഡസൻ ഓർഗാനിക്, കേജ്-ഫ്രീ ബ്രൗൺ മുട്ടകൾ ഒമ്പത് സംസ്ഥാനങ്ങളിൽ നിന്ന് തിരിച്ചുവിളിച്ചു.

വിവിധ ബ്രാൻഡ് നാമങ്ങളിൽ വിറ്റഴിച്ച മുട്ടകളിലാണ് സാൽമൊണെല്ല ബാക്ടീരിയയുടെ സാന്നിധ്യം കണ്ടെത്തിയത്. P-6562 അല്ലെങ്കിൽ CA5330 എന്ന പ്ലാന്റ് കോഡുകളുള്ളതും 2025 മാർച്ച് മുതൽ ജൂൺ വരെയുള്ള വിൽപന തീയതികളുള്ളതുമായ മുട്ടകൾ ഉപഭോക്താക്കൾ ഉടൻതന്നെ നശിപ്പിക്കുകയോ വിറ്റഴിച്ച കടകളിൽ തിരികെ നൽകുകയോ ചെയ്യണമെന്ന് സി.ഡി.സി. (സെന്റർസ് ഫോർ ഡിസീസ് കൺട്രോൾ ആൻഡ് പ്രിവൻഷൻ) കർശന നിർദ്ദേശം നൽകി. റിപ്പോർട്ട് ചെയ്യപ്പെടാത്ത കൂടുതൽ കേസുകൾ ഉണ്ടാകാൻ സാധ്യതയുണ്ടെന്നും സി.ഡി.സി. മുന്നറിയിപ്പ് നൽകിയിട്ടുണ്ട്.

തിരിച്ചുവിളിച്ച മുട്ടകൾ കാലിഫോർണിയ, നെവാഡ കൂടാതെ മറ്റ് ഏഴ് സംസ്ഥാനങ്ങളിലെ വാൾമാർട്ട്, സേഫ്‌വേ, റാൾഫ്സ് തുടങ്ങിയ പ്രമുഖ റീട്ടെയിൽ ശൃംഖലകൾ വഴിയാണ് വിപണനം ചെയ്തിരുന്നത്. പൊതുജനാരോഗ്യത്തിന് ഭീഷണിയായ ഈ വിഷയത്തിൽ വിശദമായ അന്വേഷണം നടന്നുവരികയാണ്.

English summary:

Salmonella in eggs from August Egg Company: 79 people infected, company recalls millions of eggs.