ഇടുക്കി ജില്ലാ ആശുപത്രിയിൽ ഗുരുതരമായ അനാസ്ഥ തുടരുന്നു. ലിഫ്റ്റ് തകരാറിലായതിനെ തുടർന്ന് ഡയാലിസിസ് രോഗികളെ ഉൾപ്പെടെ അഞ്ചാം നിലയിലേക്ക് ചുമന്നു കൊണ്ടുപോകേണ്ട ദയനീയ സാഹചര്യമാണ് നിലവിലുള്ളത്. ലിഫ്റ്റിന്റെ തകരാർ കാരണം കഴിഞ്ഞ ആറ് വർഷമായി ആശുപത്രിക്ക് ഫിറ്റ്നസ് സർട്ടിഫിക്കറ്റ് ലഭിച്ചിട്ടില്ല എന്നതും ആശങ്ക വർദ്ധിപ്പിക്കുന്നു.

ഇടുക്കി ജില്ലാ ആശുപത്രിയിലെ അടിസ്ഥാന സൗകര്യങ്ങളുടെ അപര്യാപ്തത പലതവണ അധികൃതരുടെ ശ്രദ്ധയിൽപ്പെടുത്തിയിട്ടും നടപടി ഉണ്ടായിട്ടില്ലെന്ന് ആക്ഷേപമുണ്ട്. പുതിയ കെട്ടിടത്തിലെ ലിഫ്റ്റ് നിർമ്മാണം പൂർത്തിയാക്കാത്തതും മറ്റ് സൗകര്യങ്ങൾ ഒരുക്കാത്തതുമാണ് ആറ് വർഷമായി ഫിറ്റ്നസ് ഇല്ലാതെ ആശുപത്രി പ്രവർത്തിക്കുന്നതിന് കാരണം. ഡയാലിസിസ് രോഗികൾക്ക് പുറമെ, ആശുപത്രിയിലെത്തുന്ന മറ്റ് രോഗികളും സമാനമായ ദുരിതം അനുഭവിക്കുകയാണ്.

അനാസ്ഥയിൽ പ്രതിഷേധിച്ച് യൂത്ത് ലീഗ് ആശുപത്രിയിലേക്ക് പ്രതിഷേധ മാർച്ച് നടത്തി. അതേസമയം, ഇത് സാങ്കേതിക പ്രശ്നം മാത്രമാണെന്നും ഉടൻ പരിഹാരം കാണുമെന്നുമാണ് ജില്ലാ പഞ്ചായത്തിൻ്റെ വിശദീകരണം.
 

English summary:

Serious negligence at Idukki District Hospital: Patients carried to the fifth floor due to a faulty lift; no fitness certificate either.