നോർമൻ, ഒക്ലഹോമ; നോർമനിൽ സ്കൂൾ ബസും  പിക്കപ്പ് ട്രക്കും  കൂട്ടിയിടിച്ച് രണ്ട് പേർ മരിച്ചതായി നോർമൻ പോലീസ് അറിയിച്ചു. വ്യാഴാഴ്ച ഉച്ചയ്ക്ക് 12:30-ഓടെയായിരുന്നു സംഭവം.

ഫ്രാങ്ക്ലിൻ റോഡിൽ  84-ആം അവന്യൂ NE-നും 108-ആം അവന്യൂവിനും ഇടയിൽ  വെച്ചാണ് പിക്കപ്പ് ട്രക്കും നോർമൻ പബ്ലിക് സ്കൂൾ ബസും കൂട്ടിയിടിച്ചത്. പ്രാഥമിക അന്വേഷണ റിപ്പോർട്ടുകൾ പ്രകാരം, ഫ്രാങ്ക്ലിൻ റോഡിലൂടെ പടിഞ്ഞാറോട്ട് സഞ്ചരിക്കുകയായിരുന്ന പിക്കപ്പ് ട്രക്ക് സെൻ്റർ ലൈൻ കടന്ന് സ്കൂൾ ബസിലേക്ക് ഇടിക്കുകയായിരുന്നു.

അപകടസമയത്ത് പിക്കപ്പ് ട്രക്കിലുണ്ടായിരുന്ന ഒരു പുരുഷനും സ്ത്രീയും സംഭവസ്ഥലത്ത് വെച്ച് തന്നെ മരിച്ചതായി പോലീസ് സ്ഥിരീകരിച്ചു.

സ്കൂൾ ബസിലുണ്ടായിരുന്ന രണ്ട് മുതിർന്നവരെ ചികിത്സയ്ക്കായി ആശുപത്രിയിൽ പ്രവേശിപ്പിച്ചെങ്കിലും, അവരുടെ നില ഗുരുതരമല്ലെന്ന്   അധികൃതർ അറിയിച്ചു. ബസിലുണ്ടായിരുന്ന മൂന്ന് കുട്ടികളിൽ  ആർക്കും പരിക്കുകളില്ലെന്ന് പോലീസ് വ്യക്തമാക്കി.

അപകടത്തെക്കുറിച്ച് കൊളിഷൻ ഇൻവെസ്റ്റിഗേഷൻ ആൻഡ് റീകൺസ്ട്രക്ഷൻ ടീം വിശദമായ അന്വേഷണം നടത്തുന്നുണ്ട്.