വാഷിംഗ്‌ടൺ ഡി സി /ന്യൂഡൽഹി: ഡൊണാൾഡ് ട്രംപ് രണ്ടാം തവണയും പ്രസിഡന്റായി അധികാരമേറ്റ 2025  ജനുവരി 20 മുതൽ അമേരിക്ക 1,563 ഇന്ത്യൻ പൗരന്മാരെ നാടുകടത്തിയതായി വിദേശകാര്യ മന്ത്രാലയം (എംഇഎ) വ്യാഴാഴ്ച അറിയിച്ചു. നാടുകടത്തപ്പെട്ടവരിൽ ഭൂരിഭാഗവും വാണിജ്യ വിമാനങ്ങൾ വഴിയാണ് ഇന്ത്യയിലേക്ക് മടങ്ങിയതെന്ന് വിദേശകാര്യ വക്താവ് രൺധീർ ജയ്‌സ്വാൾ പ്രതിവാര മാധ്യമ സമ്മേളനത്തിൽ വ്യക്തമാക്കി.

2017 മുതൽ 2021 വരെയുള്ള ട്രംപിന്റെ ആദ്യ ഭരണകാലത്ത് 6,135 ഇന്ത്യക്കാരെ യുഎസ് നാടുകടത്തിയതായി വിദേശകാര്യ മന്ത്രാലയം നേരത്തെ പാർലമെന്റിൽ പങ്കിട്ട ഡാറ്റ വ്യക്തമാക്കുന്നു. ഏറ്റവും കൂടുതൽ നാടുകടത്തലുകൾ നടന്നത് 2019 ലാണ്, 2,042 ഇന്ത്യൻ പൗരന്മാരെ തിരിച്ചയച്ചു. മറ്റ് വർഷങ്ങളിലെ കണക്കുകൾ 2017 ൽ 1,024 ഉം 2018 ൽ 1,180 ഉം 2020 ൽ 1,889 ഉം ആയിരുന്നു.

ഇതിനു വിപരീതമായി, ജോ ബൈഡൻ പ്രസിഡന്റായിരുന്ന സമയത്ത്, നാടുകടത്തപ്പെട്ട ഇന്ത്യൻ പൗരന്മാരുടെ എണ്ണം ഏകദേശം 3,000 ആയി കുറഞ്ഞിരുന്നു .

വിദേശത്ത് പോകുന്ന ഇന്ത്യക്കാർ നേരിടുന്ന നിയമപരമായ പ്രശ്നങ്ങളെക്കുറിച്ചും മന്ത്രാലയം ചർച്ച ചെയ്തു. "വിദേശത്തേക്ക് പോകുന്നവരോട്  ഞങ്ങൾ നിരന്തരം അഭ്യർത്ഥിക്കുന്നത് അവർ ആ രാജ്യത്തിന്റെ നിയമവ്യവസ്ഥ പാലിക്കുകയും രാജ്യത്തിന് നല്ല പ്രതിച്ഛായ സൃഷ്ടിക്കുകയും വേണം എന്നതാണ്," ജയ്‌സ്വാൾ  പറഞ്ഞു. കുട്ടികളുടെ അശ്ലീലസാഹിത്യം ആരോപിച്ച് വാഷിംഗ്ടണിൽ ഒരു ഇന്ത്യൻ പൗരൻ  അറസ്റ്റിലായതും , കടയിൽ  മോഷണം നടത്തിയെന്നാരോപിച്ച് മറ്റൊരു ഇന്ത്യൻ പൗരനെ അറസ്റ്റ് ചെയ്തതുമായും ബന്ധപ്പെട്ട  ചോദ്യങ്ങൾക്ക് മറുപടിയായിട്ടായിരുന്നു ഈ പ്രസ്താവന.