യാത്രക്കാർക്ക് ആശ്വാസമായി ഗൂഗിൾ മാപ്‌സ് പുതിയ ഫീച്ചർ അവതരിപ്പിച്ചു. ഇനി വഴി പറഞ്ഞു തരുന്നതിനൊപ്പം, ട്രാഫിക്കിൽ കുടുങ്ങാതെ ലക്ഷ്യസ്ഥാനത്ത് കൃത്യസമയത്ത് എത്താൻ യാത്ര എപ്പോൾ ആരംഭിക്കണം എന്നും ഗൂഗിൾ മാപ്‌സ് നിർദ്ദേശിക്കും. തിരക്ക് പിടിച്ച യാത്രകളിൽ കൃത്യ സമയത്ത് എത്തുക എന്ന വെല്ലുവിളിക്ക് ഒരു പരിഹാരമായാണ് ഗൂഗിളിൻ്റെ ഈ പുതിയ ഫീച്ചർ എത്തുന്നത്.

'Set depart or arrive time' എന്ന് പേരിട്ടിരിക്കുന്ന ഈ സവിശേഷത, ഒരു സ്ഥലത്തെ തത്സമയ ട്രാഫിക്കും അതുപോലെ മുൻ ദിവസങ്ങളിലെ ട്രാഫിക് വിവരങ്ങളും വിശകലനം ചെയ്താണ് പ്രവർത്തിക്കുന്നത്. ഉപയോക്താവ് തിരഞ്ഞെടുത്ത ദിവസവും സമയവും അനുസരിച്ച് ഏറ്റവും കുറഞ്ഞ യാത്രാ സമയം ലഭിക്കുന്നതിനായി എപ്പോൾ പുറപ്പെടണം എന്ന് ഗൂഗിൾ മാപ്‌സ് നിർദ്ദേശിക്കുന്നു.

ദൈനംദിന യാത്രകൾക്കും സമയബന്ധിതമായ മറ്റ് യാത്രകൾക്കും ഈ സവിശേഷത ഏറെ ഉപയോഗപ്രദമാകും. തിരക്ക് ഒഴിവാക്കാനും യാത്രകൾ കൂടുതൽ കാര്യക്ഷമമായി ആസൂത്രണം ചെയ്യാനും ഇത് ഉപയോക്താക്കളെ സഹായിക്കുന്നു. ഐഫോണിലും ആൻഡ്രോയിഡിലും ഗൂഗിൾ മാപ്‌സ് തുറന്ന് ലക്ഷ്യസ്ഥാനം നൽകിയ ശേഷം 'Directions' തിരഞ്ഞെടുത്ത്, മുകളിൽ വലത് കോണിലുള്ള മൂന്ന്-ഡോട്ട് ഐക്കണിൽ ടാപ്പ് ചെയ്ത് 'Set depart or arrive time' തിരഞ്ഞെടുത്ത് തീയതിയും സമയവും നൽകി ഈ ഫീച്ചർ ഉപയോഗിക്കാവുന്നതാണ്.

English summary:
Google Maps introduces new feature to advise when to leave to avoid traffic jams